2021 жылдың 21 маусымында Атырау облыстық Ш.Сариев атындағы көркемсурет және қолданбалы-сәндік өнер музейінде «21 маусым – Халықаралық әкелер күніне» орай «Бейнелеу өнері студиясында» кездесу сағаты өткізілді.

Кездесу-сағатының мақсаты: отбасындағы әке рөлі туралы, жанұядағы әке мен бала арасындағы қарым - қатынасты нығайту, ұлттық салт - дәстүрімізге байланысты әке орнының ерекше екендігін ұғындыру.

Өтілген шараға қылқалам шебері, суретші Мұрат Рахметов арнайы қонақ ретінде шақырылды. Ол студия оқушыларының қойған сауалдарына жауап бере отырып, өнер әлеміне қызығушылығының қай уақытта басталғандығы туралы, әкенің отбасындағы рөлі, жанұядағы әке мен бала қарым-қатынасын қалай нығайтуға болатындығы жайында, үлгілі әке қандай болу керек екендігі туралы өз ойын айтты.

Кездесу-сағатында суретші кіші топ студия оқушыларына арнап «Натюрморт» тақырыбында шеберлік сағатын өткізді.

Шеберлік сағаты аяқталғаннан кейін, суретші Мұрат Рахметов салған картинасы туралы баяндап, балаларға тілегін айтып, жарқын болашақ тіледі.

Жалпы, шара қызықты өтті. Студия оқушылары суретшінің әңгімелерін қызыға тыңдап, шеберлік сағатына қызығушылықпен атсалысты. Қатысушы көрермен саны: 12