2022 жылдың 3 қазан күні Атырау облыстық Ш.Сариев атындағы көркемсурет және қолданбалы-сәндік өнер музейінде «Ұлағатты ұстаздар» тақырыбында дәріс-сағат өтті.
Шараға Шаймардан Сариев атындағы Өнер музейі жанындағы «Бейнелеу өнері» студиясының оқушылары қатысты.
Атырау облыстық Шаймардан Сариев атындағы өнер музейінде «Бейнелеу өнер студиясы» жұмыс жасайды. Күні бүгін студияда оқушышылар сурет, кескіндеме, композиция бағдарламасы бойынша білім алады. Студияда екі топ бар. 6-11 жас аралығындағы «балалар» тобы мен 11 жас және жоғары «ересектер» тобы аптаның 6 күнінде оқиды. «Бейнелеу өнері» студиясында білікті де, білімді ұстаздар дәріс береді.
Үлкен топ мұғалімі Даукенов Елеуғали Тұрсынғалиұлы.
Суретші 1967 жылы 26 қараша күні Атырау қаласында дүниеге келген. 1992 жылы Н.В.Гоголь атындағы Алматы көркемсурет училищесін тәмамдаған. 1994-1996 жылдары Қазақ-Түрік лицейінде суретші-мұғалімдік қызметін атқарған. 1996-2015 жылдары Атырау Жол жөндеу мекемесі теміржол саласында суретші-безендіруші болған. 2015 жылдан Атырау облыстық Ш.Сариев атындағы көркемсурет және қолданбалы-сәндік өнер музейінде бейнелеу өнері студиясында суретші-мұғалім болып қызмет етеді. Көптеген байқау-көрмелерге қатысып, жүлделі орындарға ие болған. Туындылары Ш.Сариев атындағы Өнер музейінің қорында сақталған.
Суретші-мұғалім ұстаздық еткен шәкірттері бүгінде Халел Досмұхамедов атындағы Атырау университетінің, Т.Қ.Жүргенов атындағы қазақ ұлттық өнер академиясының, Қазақ ұлттық өнер университетінің(Шабыт), Қазақ бас сәулет-құрылыс академиясының (ҚазБСҚА), О.Таңсықбаев атындағы Aлматы сәндік және қолданбалы өнер колледжінің, Московский архитектурный институтының студенттері атанды. Әр салада еңбек етіп жатқан түлектері де жетерлік.
Көп жылдық еңбегімен суретші-мұғалім осы уақытқа дейін көптеген балалардың суретке деген қызығушылығын ашып, өнерге баули білді.
Кіші топ мұғалімі Тоқтағалиева Жадыра Нұрлыбекқызы.
1999 жылы 12 маусымда Ақтау қаласында дүниеге келген. 2021 жылы Ақтөбе Өңірлік мемлекеттік университетін «Сән дизайн» мамандығы бойынша аяқтады. Қазіргі таңда Атырау облыстық Ш.Сариев атындағы Өнер музейінде жұмыс жасайды.
Ол қазіргі заманауи оқыту-техникаларын пайдалану арқылы балаларға бейнелеу өнерінің қыр-сырларын үйретуде.
Студия мұғалімдерінің алдына қойған басты мақсаты: жас қылқалам шеберлерінің шығармашылығына қолдау көрсету, балалардың бейнелеу өнеріне деген қызығушылығын арттыру болып табылады.
Студия оқушыларымен өткен дәріс-сағатта ұлағатты ұстаздардың ерең еңбегі, шығармашылығы, Өнер музейі қорындағы туындылары туралы айтылды.
