2022 жылдың 24 қараша күні Ш.Сариев атындағы Атырау облыстық көркемсурет және сәндік-қолданбалы өнер музейінде белгілі суретші, ұстаз Елеуғали Дәукеновтың 55 жас мерейтойына арналған «Өнерліге өріс кең» тақырыбындағы шығармашылық көрмесі ұйымдастырылды.
Шараның мақсаты: Қылқалам шебері, жерлесіміз Елеуғали Тұрсынғалиұлының бейнелеу өнеріндегі шығармашылығын насихаттау, қылқалам шеберінің жеке қорында сақталған туындыларымен көрерменді кеңінен таныстыру.
Дәукенов Елеуғали Тұрсынғалиұлы 1967 жылы 26 қараша күні Атырау қаласында дүниеге келген. 1992 жылы Н.В.Гоголь атындағы Алматы көркемсурет училищесін тәмамдаған. 1994-1996 жылдары Қазақ-Түрік лицейінде суретші-мұғалімдік қызметін атқарған. 1996-2015 жылдары Атырау Жол жөндеу мекемесі теміржол саласында суретші-безендіруші болған. 2015 жылдан Атырау облыстық Ш.Сариев атындағы көркемсурет және қолданбалы-сәндік өнер музейінде бейнелеу өнері студиясында суретші-мұғалім болып қызмет етеді. Көптеген байқау-көрмелерге қатысып, жүлделі орындарға ие болған. Суретші қаламынан шыққан туындылар Ш.Сариев атындағы Өнер музейінің қорында сақталған.
Суретші-мұғалім ұстаздық еткен шәкірттері бүгінде Халел Досмұхамедов атындағы Атырау университетінің, Т.Қ.Жүргенов атындағы қазақ ұлттық өнер академиясының, Қазақ ұлттық өнер университетінің(Шабыт), Қазақ бас сәулет-құрылыс академиясының (ҚазБСҚА), О.Таңсықбаев атындағы Aлматы сәндік және қолданбалы өнер колледжінің, Мәскеу архитектуралық институтының студенттері атанған. Әр салада еңбек етіп жатқан түлектері де жетерлік.
Көп жылдық еңбегімен суретші-мұғалім осы уақытқа дейін көптеген балалардың суретке деген қызығушылығын ашып, өнерге баули білген.
«Өнерліге өріс кең» тақырыбындағы автордың тың туындылары қойылған бүгінгі көрмеге суретшінің 50-ге жуық жұмысы қойылған.
Кеш барысында Атырау облысы Ш.Сариев атындағы көркемсурет және қолданбалы-сәндік өнер музейінің басшысы Төлеген Орынбасарұлы құттықтау сөз сөйлеп, мерейтой иесіне алғыс хат табыс етті.
Суретші әр туындысында табиғатпен үйлесім таба отырып, туған жеріне, өлкесіне деген ерекше тебіренісін Жайық жағасының бейнелерін кенеп бетіне түсіру арқылы білдіре білген. Шындығында суретші қаламынан шыққан картиналардағы қай-қай көрініс те өзіне тән түстермен әсем бейнеленген. Осындай тың туындылар қойылған бүгінгі көрмеге Елеуғали Тұрсынғалиұлының ағасы Дәукенов Серікқали Тұрсынғалиұлы, Қазақстан Республикасы Суретшілер Одағының мүшесі, кескіндемеші Аманов Қамбарбек Хасенұлы, Қазақстан Республикасы Суретшілер Одағының мүшесі Айса Отаралиев секілді қылқалам шеберлері, әріптестері, ағайын-туыстары, достары, замандастары қатысып, шын жүректен шыққан тілектерін айтты. Шара барысында сенсорлық планшет арқылы Елеуғали Тұрсынғалиұлының өзге қалаларда білім алып жатқан шәкірттерінің онлайн құттықтау тілектері тыңдалды.
Шарада өнерпаздардың орындауында ән-күйден шашуы тыңдалды.
Суретшінің әр туындысы терең ой береді.Кешіміздің соңында белгілі суретші, ұстаз Елеуғали Дәукеновтың 55 жас мерейтойына арналған «Өнерліге өріс кең» тақырыбындағы шығармашылық көрмесін ашу үшін салтанатты лента қию рәсімі өткізілді. Лента қию рәсімі Серікқали Тұрсынғалиұлына, Айса Бахтиярұлына, Төлеген Орынбасарұлына және Елеуғали Тұрсынғалиұлына берілді. Көрмеге жиналған қала тұрғындары мен қонақтары қылқалам шеберінің 50-ге жуық туындысын көрме залынан тамашалады.
