2023 жылдың 20 қыркүйек күні Атырау облыстық Ш.Сариев атындағы көркемсурет және қолданбалы-сәндік өнер музейінде Қазақстан Республикасы Суретшілер Одағының 90 жылдығына орай Суретшілер Одағы Атырау облыстық филиалы көрме ұйымдастырды.
Шараны ұйымдастырудағы мақсат: Қазақстан бейнелеу өнері мен ҚР Суретшілер Одағы Атырау облыстық қоғамдық бірлестігі бойынша Суретшілер Одағына тіркелген жергілікті қылқалам шеберлерінің, қолөнер шеберлерінің туындыларын кеңінен насихаттау, рухани құндылықты жаңғыртып, Атырау қаласының тұрғындары мен қонақтарына мәдени-рухани демалыс сыйлау.
Қазақстан Республикасы Суретшілер одағының құрылғанына биыл 90 жыл. Атырау Суретшілер одағы филиалының тарихына қысқаша тоқталып өтер болсақ, кезінде, 1981 жылы Қазақстан Суретшілер Одағының Атыраудағы филиалын, сол кездегі қалалық партия комитетінің бірінші хатшысы Равиль Тажіғараұлы Шырдабаевтың өзі тікелей қолдап, Алматыдан Атырауға белгілі суретшілер Жоламан Аралбаев, Хами Айтқалиев, Саламат Өтемісов сынды ағаларымызды алдырып, ғимарат тауып, арнайы көрме зал ашып берген. Суретшілерге шығармашылықпен айналысуларына толыққанды жағдай жасаған болатын. Сол одақ филиалынан көптеген суретшілер өсіп-өнді, табысты еңбек етіп елге танылды. Бүгінде сол аға-буын суретшілер мектебінен шыққан, эстафета таяғын алып қалған шәкірттері қандайма жағдайларға қарамастан шығармашылықпен айналысып облыс, республика көлемінде ұйымдастырылып жүрген көрмелер мен шаралардан қалмай қызмет етіп келеді. Қылқалам шеберлері арасында атақ дәрежелері жоғары, суретші-профессор, академиктер, аға оқытушылар, жеке кәсіпкер, депутаттарға дейін, тіпті монументальды кескіндемешілермен қатар қолөнершілер, театрдың сценограф-суретшілері де бар. Олардың жұмыстары жеке коллекцияларда, қызмет ететін мекеме ғимараттарында, жеке қорлар мен Ш.Сариев атындағы облыстық өнер музейінде сақтаулы.
Күні бүгін Атырау облыстық суретшілер филиалында Қазақстан Суретшілер Одағының 26 мүшесі есепте тұр. Олар талай республикалық, халықаралық симпозиумдарға қатысып, байрақты бәсекеде топ жарып жүрген суретшілер.
Атырау облысы Мәдениет және тілдерді дамыту басқармасының басшысы Әбіл Жоламанов Атырау Суретшілері филиалының есеп-беру көрмесін салтанатты түрде ашып, көрме жұмысына сәттілік тіледі. Есімі елге танылған белгілі қылқалам шеберлері, Қазақстан Республикасы Суретшілер Одағының мүшелері Тілек Халинді, Қалымбек Жұмашев және Манарбек Давлетьяровты «Қазақстан Республикасы Суретшілер Одағына 90 жыл» мерейтойлық естелік медалімен марапаттады.
Бұдан әрі құттықтау сөз кезегін алған Атырау облыстық ардагерлер ұйымының төрағасы Өтешов Мұрат Сақтайұлы, ҚР Суретшілер Одағының мүшесі, Махамбет Өтемісұлы атындағы республикалық сыйлықтың лауреаты Бақтыгерей Телеубай жүрекжарды тілектерін жолдады.
Мерекелік шара барысында Н.Жантөрин атындағы облыстық филармония әншілері Ақмарал Кәдірбаева, Асет Әли музыкалық ән-шашуын арнады.
Осындай тың туындылар жинақталған көрменің ашылу салтанатында сөз алған ҚР Суретшілер Одағы Атырау облыстық филиалының төрағасы Шеруен Мұхтар Бақтығалиұлы атыраулық өнер иелерінің туындылары қойылған аталған көрме мәдени тұрғыда атқарылған игі істердің қорытындысы, суретшілердің, қолөнер иелерінің халық алдында қорытынды есеп беруі іспетті ұйымдастырылған шара екендігіне тоқталып өтті.
Қазіргі таңда Шаймардан Сариев атындағы Өнер музейі мен облыс суретшілерінің арасында берік байланыс, тығыз қарым-қатынас орнаған. Алдағы уақытта Жергілікті өнер иелерінің туындылары жинақталған ҚР Суретшілер Одағы Атырау облыстық филиалының каталогы жарыққа шығатын болады.
Көрменің салтанатты ашылуына арналған лента қию рәсімінен соң қала тұрғындары мен меймандары және облыс орталығындағы оқу орындарының көптеген студенттері көрмені тамашалады.
