2025 жылдың 14 ақпан күні Атырау облыстық Ш. Сариев атындағы көркемсурет және қолданбалы-сәндік өнер музейінде «Жаһандық өнердегі мінез» тақырыбында Мексикалық суретші Рауль Говео Перальтаның шығармашылығына арналған көрме өтті. Көрмеде суретшінің музей қорындағы жұмыстарымен таныстырылды.

Көрменің мақсаты — 2006 жылдан бері өзіне тән философиясы мен стилін бейнелейтін картиналар, фрескалар мен эскиздер жасаған мексикалық суретші Рауль Говеоның шығармашылығымен көрермендерді таныстыру. Көрмеде суретшінің «ұшатын сиырлар» сериясынан туындылары қойылды, бұл оның визиттік карточкасына айналған жұмыстар.

Рауль Говео 1975 жылы Мехикода дүниеге келген. Алдымен архитектура және өнеркәсіптік дизайн саласында білім алған ол 2005 жылы толықтай живопиське арнауды шешкен. Оның жұмыстары Польшада, Қазақстанда, Болгарияда, Венада және басқа да елдерде көрмеге қойылды. Раульдың картиналары әлемнің көптеген жеке коллекцияларында сақтаулы.

Ш. Сариев атындағы музей қорында оның «Локомотив», «Жылы жел», «Мексикалық суретші Фрида Калоның портреті» атты картиналары сақталған. Бұл туындылар көрмені тамашалауға келген Қ.Дүтбаева атындағы гуманитарлық колледжінің студенттері және Атырау облыстық санаториялық мектеп интернатының оқушыларына ұсынылып, таныстырылды.