2025 жылдың 21 ақпан күні Атырау облыстық Ш.Сариев атындағы көркемсурет және қолданбалы-сәндік өнер музейінде ҚР Суретшілер Одағының мүшесі Сәдір Кәрібай Көпжанұлының музей қорындағы туындыларынан «Мәлім де беймәлім өнер иесі» тақырыбында көрме өтті. 

Көрменің мақсаты – суретшінің музей қорындағы туындыларын таныстыру, насихаттау.

Сәдір Кәрібай — Қазақстанның танымал суретшісі, 1956 жылы Қызылорда облысы, Арал қаласында дүниеге келген. 1983 жылы Шымкент қаласындағы Ә. Қастеев атындағы көркемсурет училищесін тәмамдаған соң, Атырау қаласына қоныс аударып, облыстық Суретшілер одағында қызмет атқарды. 1992 жылдан бастап Қазақстан Суретшілер одағының мүшесі болып табылады.

Сәдір Кәрібайдың шығармалары облыстық және республикалық көрмелерде ұсынылып, Қазақстанның музей қорларында және шетелдік коллекционерлердің жинақтарында сақтаулы. Оның туындылары қазақтың ұлттық мәдениеті мен тұрмысын бейнелей отырып, көрермендерге терең әсер қалдырады.

Өнер музейінің қорында Сәдір Кәрібай Көпжанұлының «Ұйқы»; «Натюрморт»; «Шежіре»; «Күн аулаушы»; «Мұнайшы»; «Жылқының басы»; «Рембаза-1»; «Рембаза-2»; «Исатай-Махамбет алаңы»; «Абай композициясы»; «Жайық жағасы» тақырыбында туындылары бар.

Шараға О.Көшеков атындағы Атырау аграрлы-техникалық колледжінің I курс студенттері қатысты.