2025 жылдың 26 ақпан күні сағат 11:00 - де Атырау облыстық Ш.Сариев атындағы көркемсурет және қолданбалы-сәндік өнер музейінде ҚР Суретшілер Одағының мүшесі, ҚР еңбек сіңірген Мәдениет қайраткері, «Әлем халықтарының өнері» Халықаралық қауымдастығының Еңбек сіңірген суретшісі Қожамқұлов Зұлқайнар Қожамқұлұлының «Көңіл күй кеңістігі» тақырыбындағы  музей қорындағы шығармаларына арналған  дәріс сағат өтті.

Дәріс сағаттың мақсаты – оңтүстiк өлкесiне ғана емес, республикаға танымал қылқалам шеберi,кескiндеме өнерiнде өзiндiк өрнегi бар, өзiне тән қолтаңбасы бар суретшінің  музей қорындағы туындыларын көрермендерге насихаттау. Суретшінің ірі туындылары қатарына 1995-1997 жылдары Б.Түлкиевпен бірлесіп салған тарихи "Ұлы көш" суреті жатады. Ол қазір Алматы қаласындағы Елбасы Резиденциясында тұр. Екінші ірі туындыларының бірі - Түркістан қаласындағы монументалды "Түркі халықтарының тарихы" атты панорамалық жұмысы болып табылады.

Дәріс сағатта суретшінің  Ш.Сариев атындағы  көркемсурет және қолданбалы-сәндік өнер музейіндегі «Адай», «Аламан» және  «Жайық жағасында»  атты туындылары таныстырылды. Қылқалам шебері жұртшылыққа суретші ретінде ғана емес, майлы бояу шебері әрі, мүсінші ретінде белгілі.