2025 жылы 11 наурызда Атырау облыстық Шаймардан Сариев атындағы көркемсурет және қолданбалы-сәндік өнер музейінде белгілі қазақстандық суретші Табылды Мұқатовтың шығармашылығына және оның музей қорындағы туындыларына арналған «Біз ойламаған әлем» тақырыбында көрме өтті.

Көрменің мақсаты -  1975 жылдан бастап графика және кескіндеме саласында жұмыс істеген Табылды Мұқатовтың шығармашылығымен танысу. Көрмеде оның кубизм элементтері бар көркемдік стилін бейнелейтін туындылары ұсынылды. Мұқат Табылдының туындылары Қазақстанда және шетелде қойылып, А. Кастеев атындағы Мемлекеттік өнер музейінде сақталуда, сондай-ақ Германия, Ұлыбритания, Франция және Даниядағы жеке коллекцияларда да бар.

Табылды Мұқатов 1947 жылы Атырау облысы Орпа ауылында дүниеге келген. Ол Н. Гоголь атындағы Алматы көркемсурет училищесін және И. Федоров атындағы украин полиграфия институтын бітірген.

Музей қорында суретшінің «Исатай-Махамбет», «Н.Жантөриннің бейнесі», «Асан қайғы Сәбитұлы», «Жайық үстіндегі көпір», «Атыраудағы мешіт» және «Алаша тоқушы» картиналары сақталған. Бұл картиналар химия-биологиялық бағыттағы Назарбаев зияткерлік мектебінің оқушыларына  ұсынылды.