2025 жылдың 20 наурыз күні Ш.Сариев атындағы көркемсурет және қолданбалы-сәндік өнер музейінде 22 наурыз – «Ұлыстың Ұлы күні - Наурыз» мерекесіне арналған «Наурыз – жыл басы» тақырыбында мерекелік шара, көрме өтті.
Шараның мақсаты: наурыз мейрамының тарихи маңызы мен оның халық үшін құндылығын насихаттау, мерекені атап өту, қазақ мәдениеті мен салт-дәстүрлерін жаңғырту.
Наурыз – ерекше, ұлық мереке. Бұл мейрам – жаңару мен үміттің, бейбітшіліктің, бірліктің белгісі. Қазақ халқы үшін Наурыз – көктемнің, өмірдің, жаңа бастамалардың мерекесі. Ол көктемнің алғашқы күніне сәйкес келеді және табиғаттың жаңаруы мен гүлденуін бейнелейді. Наурыз күнінде барлық тіршілік жаңа өмірмен басталады, адамдар бір-біріне жақсылық тілеп, құрмет көрсетеді. Наурыз көже дайындау, ағаш отырғызу, әр түрлі дәстүрлер мен салттар осы күні орындалады.
Mерекелік шараны Атырау облысы Мәдениет және тілдерді дамыту басқармасының басшысы Жоламанов Әбіл Тауфикұлы құттықтау сөз сөйлеп ашып, наурыз мерекесінің мақсаты мен ерекшелігіне тоқталды. Шара барысында қазақ халқының бүгінгі күнге дейін сақталып келе жатқан ең маңызды және көне ғұрыптарының бірі – тұсау кесу рәсімі өткізілді. Тұсаукесер – сәби бесіктен шығып, еңбектеуден өткен соң, қаз тұрып, тәй-тәй басқанда жасалатын дәстүр. Бала екі табанымен тұрып, алғашқы қадам жасауға талпына бастаған сәтте дана қазақ “баламыз тез жүріп кетсін” деген ниетпен, сәбидің тұсауын кестіріп, думандатып той жасаған. Халықтық түсінік бойынша, тұсауы кесілмеген бала сүріншек болады. Сондықтан, тәй-тәй басып келе жатқан баланың тұсауын елге белгілі,сыйлы жандарға кестіретін болған, ол бүгінгі күнге дейін жалғасып келе жатқан ескі дәстүр. Мерекелік шарада Дюсебаевтар әулетінің батыры Қазмұқаш немересі Сәттібекұлы Әмірханның тұсауы кесілді. Тұсаукесер рәсімін арнайы мейманымыз Қазақстан және Қырғызстан Республикасының «Еңбек сіңірген қайраткері», «Парасат», «Дәнекер», «Отан» ордендерінің иегері, «Қазақстанның Еңбек Ері» Илья Жақанов ағамыз өткізді. Құлдырандап шауып кеткен сәбидің болашағы жарқын болсын деген тілегі мен ақ батасын арнады.
Шарада Нұрмұхан Жантурин атындағы Атырау облыстық филармониясының әншісі Б.Құбашев «Наурыз жырын» арнады және музей жанындағы бейнелеу өнер студиясының оқушысы Д.Рамазан «Қамажай» биін биледі. Мерекелік шараға өнер музейінің ардагерлері Оразова Сания Утепкалиевна, Зайдуллин Жайдарбек Зайдуллаұлы, Қанаева Гүларшын Наркесқызы және Ли Афанасий Никитич арнайы шақырылды. Шараға қатысушылар Өнер музейінің жанындағы бейнелеу өнер студиясының жас суретшілерінің көрмесі және музей қоры туындыларынан жасақталған көрмемен танысты. Меймандарға ақ өнімдері қойылған мерекелік дастархан жайылып, наурыз көже ұсынылып, құрмет көрсетілді. Кеш соңында «Ұрпақ азбасын, дәстүр тозбасын» - дей отырып, Илья Жақанов ағамыз музей ұжымына, шараға қатысушы барлық меймандарға “наурыз-бата” берді.
